- 74 -

1324. Aug. 9. Liegnitz.

Verpachtung der dem Hospital ad St. Nicolaum gehörigen Ueberschar-Aecker an Heinrich de Rugia, Nicolaus Merclini und Conrad Cingil.

In nomine domini amen. Quoniam obliuio memorie solet nouercari, dignum est, vt ea, que in longeuam deducenda sunt memoriam literarum testimonio et testium fulcimento perhennentur, hinc est, quod nos, Henricus de Woycesdorff magister ciuium in Legnicz, vna cum consulibus ibidem, videlicet Henricus de Croczicz, Johanne Ledersnider, Wernhero Parvo, Nicolao Merclini ac alijs nostris senioribus, notum facimus vniuersis presentem literam inspecturis, quod religiosus vir, frater Sifridus, magister domus hospitalis sancti Mathie in Wratislauia cruciferorum cum stella ordinis sancti Augustini, deliberato animo et cum consensu Johannis Baran, prioris et tocius conuentus predicte domus, coram nobis in pretorio nostro vna cum conciuibus nostris videlicet Henrico de Rugia, Nicolao Merclini et Conrado Cingil constitutus locauit seu exposuit iure hereditario eisdem ac eorum legitimis successoribus pro annuo censu quandam remanenciam agrorum, que in wlgari dicitur eyn obirschar, iacentem circa Legnicz, pertinentem ad hospitale sancti Nicolai seu ecclesie ibidem ante Legnicz in hunc modum, quod, diviso agro per ipsos in tres partes, Nicolaus Merclini de parte sua agrorum predictorum aut eius legittimi successores dabit aut dari procurabit singulis annis ac perpetue dimidiam marcam communis pagamenti census veri absque omni dilacione predicte domui in Legnicz seu priori ibidem ad vtilitatem conuentus super festo beati Michaelis et vnam maldratam bone siliginis super festo beati Martini proxime subsequenti et quatuor scotos denariorum census episcopalis dari procurabit; simili modo et per omnem modum, sicut predictum est, de procuracione census predicti tam in denarijs quam in siligine a Nicolao Merclini et Cunradus Cingil de sua parte agrorum aut sui legittimi successores dabit aut ordinabit vnam marcam communis pagamenti super festo beati Michaelis et vnam maldratam siliginis bone ac quatuor scotos denariorum census episcopalis super festo beati Martini proxime subsequenti, adiectis talibus condicionibus, quod predicti ciues nostri aut eorum successores legittimi possunt predictam locacionem agrorum vendere, commutare aut exponere, censu predicto nichilominus remanente, resignacio quoque predictorum agrorum coram priore aut conuentu domus predicte videlicet sancti Nicolai debet celebrari. Preterea adiectum fuit, quod, quicumque ex predictis ciuibus aut eorum successoribus in terminis legittimis constitutis ausu temerario aut negligenter censum suum non procuraret et ad domum predicti hospitalis non conduceret, illum in bonis suis, vbicunque habitis, extra ciuitatem, aut in ciuitate iudex hereditarius debet impignorare et pignora magistro domus hospitalis sancti Nicolai presentare. In cuius rei testimonium et robur perpetuum presens scriptum sigillo ciuitatis maiori et sigillis scabinorum nostrorum duximus roborandum. Actum et datum in vigilia beati Laurencij anno domini M°CCC°XX° quarto, coram nobis et coram Nicolao de Woycesdorff iudice nostro ac scabinis vniuersis videlicet Jescone Cerstani, Hermanno Lubez, Peczoldo Kalis, Cunrado Albi, Henrico Ysinberch, Duringo et Vinrico Pistore, in iudicio bannito constitutis.

Nach zwei Abschriften, denen eine deutsche Uebersetzung beigefügt ist, in: Liegnitzer Archiv-Acten No. 297, Hospitäler betreffend.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866